តំណាងក្លឹបថា«អាជ្ញាធរខណ្ឌហឹ្នងប្រយ័ត្នជ្រុះស័ក្តិ» ខណៈឃាត់អប់រំសិស្ស ២៧នាក់ ច្រៀងពពាក់ពពូននៅក្លឹប
26-December-2015 | ដោយ ពល រាជសី
ភ្នំពេញ៖ «អាជ្ញាធរខណ្ឌហឹ្នងប្រយ័ត្នជ្រុះស័ក្តិ» នេះជាការព្រមានមកលើអាជ្ញាធររបស់តំណាងក្លឹប«ដឺ ហាប់ ខារ៉ាអូខេគ្រួសារ» ខណៈអាជ្ញាធរ និងកម្លាំងអាវុធហត្ថ ខណ្ឌជ្រោយចង្វារ ចុះឃាត់អប់រំសិស្ស ២៧នាក់ ដែលកំពុងច្រៀងពពាក់ពពូននៅក្លឹបកណ្តាលថ្ងៃ។
នៅរសៀលថ្ងៃទី២៥ ខែធ្នូ ឆ្នាំ២០១៥ អាជ្ញាធរ និងកម្លាំងអាវុធហត្ថ ខណ្ឌជ្រោយចង្វារ ដឹកនាំដោយលោក ហ៊ុយ សារុន អភិបាលរងខណ្ឌ បានចុះទៅឃាត់ក្មេងៗសិស្សសាលាចំនួន២៧នាក់ មានស្រីមានប្រុសភាគច្រើនមិនទាន់គ្រប់អាយុ ខណៈពួកគេកំពុងចូលច្រៀងនៅក្លឹប «ដឺ ហាប់ ខារ៉ាអូខេគ្រួសារ» ទាំងថ្ងៃ ស្ថិតនៅតាមផ្លូវម៉ាស៊ីនទឹក ក្រុមទី៦ ភូមិ៣ សង្កាត់-ខណ្ឌជ្រោយចង្វារ។
មូលហេតុដែលនាំឲ្យ អាជ្ញាធរខណ្ឌបើកប្រតិបត្តិការចុះទៅឃាត់ ខ្លួនក្មេងសិស្សសាលាមានស្រីមានប្រុស នៅក្នុងក្លឹបមួយនេះ ដោយសារតែមានពាក្យបណ្តឹង របស់ប្រជាពលរដ្ឋដែលជាអណាព្យាបាលថា កូនៗរបស់ខ្លួន មិនសូវបានចូលរៀននោះទេ ដោយសារតែពួកគេបាននាំគ្នាទៅចូលច្រៀងនៅខារ៉ាអូខេលើនេះ ស្ទើរជារៀងរាល់ថ្ងៃ។
សិស្សសាលាទាំងនេះ ត្រូវបានអាជ្ញាធរអះអាងថា រៀននៅតាមវិទ្យាល័យមួយចំនួននៅក្នុងខណ្ឌជ្រោយចង្វារ ហើយពួកគេមិនសូវបានចូលរៀននោះឡើយ ដោយនាំគ្នាមកចូលច្រៀងយ៉ាងពពាក់ពពូនយ៉ាងដូច្នេះ។ សកម្មភាពបែបនេះ ដោយសារតែខាងម្ចាស់ក្លឹប បានបណ្តែតបណ្តោយដោយពុំបានហាមឃាត់នោះទេ។
ម្ចាស់ក្លឹបមួយនេះមានតួនាទីជាជំនួយការរបស់រដ្ឋមន្ត្រីមួយរូប ហើយនៅពេលកំពុងប្រតិបត្តិការនោះ ស្រាប់តែមានតំណាងក្លឹបម្នាក់ចេញមក ប្រើពាក្យសម្តីព្រមានថា «អាជ្ញាធរខណ្ឌហឹ្នងប្រយ័ត្នជ្រុះស័ក្តិ»។
យ៉ាងណាក៏ដោយ សម្រាប់ក្មេងសិស្សទាំងនេះ ត្រូវបានអាជ្ញាធរធ្វើការដោះលែងត្រឡប់ទៅវិញ ក្រោយពីអប់រំ និងមានការធានាពីឪពុកម្តាយរបស់ពួកគេ។
ដោយឡែក ក្លឹបមួយនេះ អាជ្ញាធរខណ្ឌ ក្រោមបញ្ជាពីលោក ឃ្លាំង ហួត ជាអភិបាលខណ្ឌ បានសម្រេចបិទចោលជាបណ្តោះអាសន្ន រង់ចាំការដោះស្រាយនៅពេលក្រោយ៕
ចំនួនអ្នកទស្សនា
- ថ្ងៃនេះ4401
- ម្សិលមិញ12561
- សប្តាហ៍នេះ32351
- ខែនេះ54231
- ឆ្នាំនេះ54231
- សរុប20496687